【明報專訊】香港復興會新界東候選人陳雲(陳云根)經常都喺facebook發表言論，噚日同區候選人、民主黨嘅林卓廷就喺商台選舉論壇要求陳雲解釋，點解要參與「六四晚會」嘅市民「落地獄」；陳雲話係要「強化支持者嘅信念」，又質疑林卓廷「完全唔明白facebook嘅政治修辭學」，仲話反對佢言論嘅人一律會被嚴格「封鎖」。 商台《在晴朗的一天出發》噚日舉行立法會新界東選舉論壇，席間林卓廷讀出陳雲以前喺facebook嘅留言﹕「我(陳雲)會咒罵所有去支聯會六四晚會的人落地獄，五雷轟頂，早死早著，對了，是所有參與者無一倖免，全部落地獄」；又質疑陳有啲言論「侮辱緊香港女性」。不過陳雲就話唔回答，「因為你完全唔明facebook點玩」。 人民力量陳志全都加入戰團，批評陳雲經常喺網上發表侮辱女性、人性嘅言論，問佢點解要反對同性婚姻同動物權益；陳雲話「短時間好難解釋」，陳志全即反駁：「咁你唔使嚟論壇，論壇就係咁短時間。」
|
| |
| |
