【明報專訊】中秋節將至，月餅又登場，但其實每年香港人都食剩唔少月餅造成浪費。食物回收組織「食德好」舉辦第三屆「有營過中秋」惜食約章運動，鼓勵各界企業、團體承諾今年唔送月餅畀客戶，或者表明唔接收月餅賀禮，希望減少企業間送禮習慣引致嘅剩食問題。目前已有超過180間來自唔同界別嘅企業、公營團體同大型屋苑商場簽署約章，參與團體數目比往年多逾四成。 「食德好」今年亦會喺中秋期間，於超過150個屋苑、商場同商廈設立月餅回收點，鼓勵公眾喺節日前夕盡早捐贈過剩月餅，義工會將月餅送畀有需要家庭，減廢之餘又可惠及基層。 「食德好」話喺7至8月做調查，訪問咗349個家庭去年食剩月餅情况，發現受訪家庭舊年平均食剩1.03個月餅，比2015年 (1.08個)同2014年 (1.23)為少，但如果以香港100萬個家庭推算，去年港人就食剩103萬個月餅，丟棄送往堆填區更高達43萬個，嚴重破壞環境。
|
| |
| |
