【明報專訊】本報噚日報道西九管理局上年初開始，直接向M+總承建商新昌嘅分判商付款，西九解釋一早同立法會交代咗，點知畀議員群起圍攻話從未聽過。事件仍未平息之際，西九再爆公關災難，將今個月5號晚上回覆本報、但噚日先上載嘅聲明，時光倒流寫話係7月6日嘅新聞稿，令其他傳媒行家誤以為西九本月初已經自爆事件。 Emily同事自跟進呢隻故仔以嚟，日日睇住西九網頁，截至前晚仍未見過呢份聲明，用Google網頁嘅快取功能，顯示截至前日(14日)西九網頁都未有呢份「7月6日」嘅聲明，Emily於是好奇直接問西九點解會咁，結果唔使幾分鐘，西九又將聲明日期變番即日、7月16日。 陳淑莊唔信手民之誤 立法會議員陳淑莊話，估計西九出現「手民之誤」可能性好低，批評管理局處理手法有問題，「唔止誤導傳媒，甚至誤導公眾」，如果西九故意改日期係「不能接受」及「手法卑鄙」。
|
| |
| |
