【明報專訊】反修例運動多番強調「無大台」，泛民主派無法主導事件，但建制陣營唔相信，不時質疑運動背後有指揮、有大台咁話；前日星期日好多市民參與民陣舉行嘅集會，堅守「和理非」，但就令全國人大代表、工聯會會長吳秋北話，民陣搞和理非，正正係承認之前所有嘅暴力都係有預謀，仲話：「如果還說沒有大台你還想信嗎？」 吳秋北喺facebook話，為洗脫8．13機場「恐怖暴亂罪惡」，民陣出台搞和理非，「策動不衝警察不衝政總，這說明沒有暴徒衝擊，就沒有警察止暴」，又話民陣終於承認之前所有暴力都係故意同有預謀。 周日集會部分示威者一度聚集金鐘夏愨道，最終無暴力或衝擊事件發生，吳秋北就話「爛頭卒和跟尾狗沒有衝」就因為有大台，所以「放言威脅要暴力升級」。佢話今日市民要考慮嘅，係點解要跟住暴動、跟住港獨去自殺。
|
| |
| |
