【明報專訊】疫情當前，不同人生產口罩防疫，自由黨黨魁鍾國斌(Felix)生產咗一批防菌嘅可重用布口罩，佢噚日約咗財政司長陳茂波見面，就帶咗7個布口罩送畀司長試用，不過財爺助手唔肯收，免得要申報，結果即場「現兜兜」畀咗700蚊買。 鍾稱出口界「大鑊過零售業10倍」 鍾國斌約見財爺係想佢留意本港出口界面臨好大困境，Felix形容「仲大鑊過零售業10倍」。佢話，歐美市場停擺，百貨公司、零售店閂晒門，自然就唔要貨，而要咗貨嘅就用home office作藉口拖數，或者放晒喺倉唔運出舖頭；佢又話，已落單生產緊嘅貨都要暫緩，每間廠家都有幾千萬貨「企晒喺度」，夾夾埋埋過千億元資金鏈將斷裂。佢同司長講，咁會影響整個銀行體系。 Felix引述財爺反問，「係咪有咁嚴峻」？Felix話佢要求政府同銀行講，將還款期由90日延長至180日，唔好令啲公司面對咁困難嘅環境，仲因為遲還款而「吸隻黑豬」，搞到無得申請中小企信貸擔保基金；金管局要放寬銀行借貸比率。佢又建議，政府畀僱主停供6個月強積金，適合時候再供番相關嘅錢落去，令到僱主資金可以鬆動啲。
|
| |
| |
;)
