【明報專訊】真普選聯盟同公民黨聽日喺城巿大學舉行「公民提名何懼之有」研討會，不過，佢哋前排呻，話邀請港區人大代表譚惠珠等建制派人士時頻食閉門羹。珠姐噚日就話，若果學民思潮第日舉辦有關《基本法》嘅論壇，佢會樂意出席，仲連power point都準備好，唔通珠姐獨愛學民仔？ 話整好百張slides講解 話說珠姐噚日同學民思潮黎汶洛一齊出席港台節目《議事論事》，珠姐一開波聽到黎汶洛堅持公民提名，就搶咪質疑做法係咪符合《基本法》。會後珠姐語重心長咁話，他日學民仔有乜關於《基本法》嘅論壇，佢都好樂意出席，仲話已經整好107張slides(幻燈片)講解。黎汶洛見到珠姐咁熱情都打個突，佢之後同Emily講，學民仔開學後比較忙，暫時無諗住搞論壇，就算真係搞，都唔會淨係邀請珠姐一個。 雖然聽日論壇見唔到珠姐，但就有「幫港出聲」發起人何濼生同港大法律學者陳弘毅，平時不苟言笑嘅陳弘毅噚日錄影港台節目時一聽到論壇，就忍唔住問隔籬位，聽日論壇會唔會有人搗亂，睇嚟佢都幾擔心。 聽日旺角 論壇打孖嚟 聽日除咗真普聯同公民黨喺城大合辦論壇，公民黨九龍西支部同一時間喺旺角行人專用區舉行佔中論壇，公民黨立法會議員毛孟靜會出席。有人好奇點解咁都鬧雙胞胎，但雙方話月前已安排論壇，無得改期，唔通佢哋一直無溝通？
|
| |
| |
