CY買餸順便宣傳政改
[2015.05.02] 發表
【明報專訊】落區宣傳政改又點少得講過「落區無難度」嘅特首梁振英，CY噚日趁五一假期自備環保袋去咗鵝頸橋街市買急凍雞柳同生果。CY買餸之餘，仲不時拎政改宣傳單張同「2017一定要得」嘅貼紙派畀市民，兼玩自拍。有細路女拎到貼紙之後，仲爭住貼喺CY件衫度，圍住CY氹氹轉。
店員問「今日咁得閒？」
支持CY嘅網上平台《港人講地》噚晚發布3段話係「讀者來片」嘅CY落區短片，見到CY一身白色恤衫西褲皮鞋，拎住個棕色布袋去鵝頸橋買餸。CY去咗間舖頭買咗30蚊雞柳，有店員仲問CY﹕「今日咁得閒呀？」
訪美科研學術機構 楊偉雄同行
另外，CY下星期一應國泰邀請，搭直航機去波士頓參加晚宴，慶祝兩地直航航班投入服務。
波士頓最出名就係龍蝦，唔知CY去到當地有無得食呢？政府新聞稿就無講，但就話CY會參觀兩間喺科研方面具領導地位嘅學術機構，創新及科技諮詢委員會主席楊偉雄亦會同行。
咁橋政務司長林鄭月娥下星期要出訪歐洲，所以特首職務要由財政司長曾俊華署任。
更多港聞
【明報專訊】工聯會立法會議員王國興上星期喺《城市論壇》老羞成怒，向學民思潮發言人黎汶洛講咗一句「收皮啦」，佢強調呢句只係俚語，並無用詞不當。...
詳情
相關新聞
