阿松畫「蟲蟲罐」 一家五口love HK

阿松畫「蟲蟲罐」一家五口love HK

[2015.07.22] 發表

【明報專訊】「惜食堂」舉辦「全『誠』罐膳心」罐頭設計比賽，邀請學生利用環保物料為罐頭重新裝飾，傳達珍惜食物嘅信息。前財政司長梁錦松帶同3個仔女出席活動，齊齊畫罐頭。

早前團結香港基金大張旗鼓話要推動創意，又話要重視青年工作，身為基金會顧問嘅阿松，似乎都交足功課，活動一開波就話諗咗好耐年輕人鍾意啲乜嘢，又大讚港青有創意，希望年輕人透過呢個活動發揮創意。

佢又自爆細個做幼稚園親子手作要設計家居，但就無得貼堂，「我以為有創意，點知整咗間教堂出嚟，咁梗係畀先生鬧咗一餐啦！」今次阿松喺罐頭上畫咗5條蟲，寓意一家五口咁解，又寫下We love Hong Kong字句。大女Amy以花作主題，仲話遲啲會去夏威夷旅行，而二仔Edward就畫咗薄餅，細仔James就畫咗西瓜、蘿蔔同湯。

其實唔止梁錦松，一眾司局長同演藝界人士包括林鄭月娥、張建宗、薛家燕都會畫罐頭。作品會喺9月29號至10月13號喺銅鑼灣希慎廣場展出，大家到時不妨睇吓啲司局長有幾創意無限啦。