難得做委會主席 卿姐開會遲到 同事「拉布」等埋
[2015.11.14] 發表
【明報專訊】民主黨主席劉慧卿雖然無回鄉證返內地，但噚日佢喺立法會大樓巧遇一班來自廣州真光中學嘅同學參觀大樓，仲同班學生妹合照。𠵱班妹妹知唔知卿姐係邊位？卿姐笑住話，自我介紹時講明「我係返唔到大陸嘅劉慧卿」，仲話送咗兩本《我在民主黨的日子》嘅書畀學生，但講明如果因為本書而過唔到關，就「唔好賴我」。
巧遇廣州學生 笑言返唔到大陸
此外，𠵱家立法會除咗有「等埋發叔」，噚日有一個委員會開會，亦出現「等埋卿姐」嘅事，而卿姐更獲得建制派、金融界議員吳亮星(星爺)提名，坐正委員會嘅主席。咩委員會咁勁？就係「立法會廣場使用事宜委員會」。
建制派目前包攬咗多個立法會正、副主席位置，卿姐終於成功「奪得」一個主席之位，但卿姐笑稱「𠵱個(委員會)有咩好奪，又唔見喺財委會佢哋(建制派)咁易話為。」卿姐話𠵱個委員會極少開會，噚日都靠同事提醒先記得去開，所以遲到，會內其他成員就「拉住布」、「等埋卿姐」，星爺話提名卿姐，係因為「實務需要，無政治考慮」喎。
更多港聞
相關新聞
