河國榮「被代言」 訪問變廣告 《蘋果》解僱廣告部職員
[2016.03.31] 發表
【明報專訊】藝人河國榮噚日喺facebook話，早前收到一個信息，有媒體想同佢做一個有關曲奇餅嘅訪問，但到「訪問」出版後，卻發現該篇「報道」寫住「廣告」二字。事件引起唔少人談論，而涉及事件嘅《蘋果日報》反應都算快，即刻處理，傍晚發聲明，話內部調查後證實無任何編採人員參與有關版面內容，但話「印刷分類廣告部有個別同事未能恪守廣告製作程序」，致事件發生，涉事員工即日被停職解僱。
河國榮﹕非任何曲奇代言人
《蘋果》話對事件為河國榮帶來困擾深表歉意，重申該報絕唔會混淆新聞採訪和廣告製作，將致力加強監察製作流程，不讓同類事件發生。
河國榮喺fb講番「被代言」事件，指2月收到「採訪」邀請信息，有媒體想同佢做一個有關曲奇餅嘅訪問，並有車馬費，但到咗曲奇店後，攝影師即安排佢同曲奇產品影相。佢感到奇怪，問對方「不是訪問嗎？」對方就多次回答係訪問，唔係廣告。不過，到上周日(20日)呢篇「訪問」出版後，佢先發現呢篇「報道」寫住「廣告」二字。河國榮話，佢雖然鍾意食曲奇，但強調個人並非任何曲奇牌子嘅代言人。
更多港聞
相關新聞
