41歲鄧健泓跪地鑽戒求婚 29歲石詠莉喊爆：我願意
[2016.03.31] 發表
【明報專訊】41歲鄧健泓向29歲女友石詠莉求婚成功！石詠莉前晚在「IFPI香港唱片銷量大獎頒獎典禮」雙喜臨門，憑去年與鄧健泓共同製作的首張Hi-Fi碟《聽聽 Sukie's 》奪得「十大銷量廣東唱片」及躋身「十大銷量本地歌手」。鄧健泓為賀女友連中兩元，之後準備了神秘驚喜派對，在半百親友見證下，他突然捧着99朵玫瑰及鑽戒，跪地向女友求婚，問：「你願意嫁給我嗎？」石詠莉感動變喊包，半哭半笑說：「我願意！」
贈99朵玫瑰 半百親友見證
41歲鄧健泓前晚搞神秘驚喜派對，向29歲女友石詠莉求婚，雙方家人都有出席。全不知情的石詠莉驚見大班親友拍掌歡迎，已立即喊。鄧健泓在台上說：「今日兩個獎對我哋好大意義，一開始做這隻碟時，我同佢講，我哋唔好等機會，我哋自己做啦！目標就係今晚嘅IFPI，結果我哋攞到。我哋做每一樣嘢都有目標，人生及愛情都係，所以今日我想做一樣嘢，佢成日話我未求婚，我想喺一個right moment去求婚。多謝你，我唔富有，我會將我最好嘅同你分享，以後都係，永遠都係。」
雙喜臨門 溫馨咀嘴
此時鄧健泓手持花束跪在地上，並拿出鑽戒求婚，但他緊張到失失慌，不時傻笑，之後發表愛的宣言：「呢3年我哋經歷好多，希望將來我哋一路喺呢條船度繼續向前行，你願意嫁畀我嗎？」不停喊的石詠莉點頭肯嫁，鄧健泓為她戴上鑽戒，兩人在嘉賓起哄下吻了一啖，感人。
女友完成新碟再計劃婚事
鄧健泓透露籌備了整個月，問到鑽戒多少卡？他說價錢不緊要，最重要誠意，相信就算是草戒指或汽水樽蓋，她都會應承。由於今年是盲年，待女友今年完成第2隻Hi-Fi碟才計劃婚事。石詠莉說好驚喜冧爆，事前覺得男友有些蠱惑，朋友亦有點古怪，原來是這樣。
娛樂組
更多影視
鄭秀文爆許志安拒接收工 夫妻檔攞獎 同場不相見
【明報專訊】許志安和太太鄭秀文（Sammi）前晚「激罕」夫妻檔出席「IFPI香港唱片銷量大獎」頒獎禮，但兩公婆同場不相見，安仔打頭陣連掃3個... 詳情
相關新聞
