職工盟賣旗日全力「去膠」
[2017.08.09] 發表
【明報專訊】今時今日，團體賣旗籌款都要搞搞新主意，職工盟教育基金今日(8月9日)喺九龍區舉行賣旗日，話今次係全力「去膠」推動環保，並簽署「綠瓶子承諾」，減少喺過程中耗用紙張、水樽等物資。
職工盟噚日同環團一齊開記者會，話近年社會愈來愈關心大型籌款活動會唔會製造大量垃圾及浪費，職工盟於是搞綠色賣旗日，話估計賣旗會動員大批義工，估算如果派水，要用逾1000個水樽，另外亦要派食物畀義工。職工盟就有環團Urban Spring幫手，會喺觀塘港鐵站設水站為義工「補水」。食物回收組織「食德好」亦會捐出食物畀義工享用。
同時，佢哋話會用環保紙張印製宣傳物品，並盡量用短訊發放義工須知，減少耗廢。職工盟教育基金董事李卓人就話，希望大家做善事之餘，都可以一齊支持「去膠」嘅理念。
更多港聞
相關新聞
