【明報專訊】前財政司長曾俊華早前為港台節目《香港故事》擔任主持，結果引發爭議，政府主動向港台關注曾俊華未有「申報」；曾俊華就覺得無受薪係唔使向政府申請。呢個節目11月18日(星期六)晚上首播，節目命名為《修復時刻》，噚日就喺facebook發宣傳片，曾俊華亦有幫手宣傳。 Emily聽聞，呢個節目以「修復」為主題，10集分別講「修復裂痕」、「修復記憶」、「修復廣東歌」、「修復家庭」、「修復南音」及「修復自信」等。港台呢條宣傳片可見，曾俊華做主持都好落力，唔係「齋講」，好似一集講及南音，曾俊華就敲木魚；講到自信一集，識武術嘅曾俊華更大耍兵器。宣傳片中曾太亦粉墨登場，同老公講吓喺美國嘅回憶。 曾俊華喺fb專頁宣傳節目一連10集將訴說10個修復嘅故事，仲乘機抽吓水，hashtag寫「申報定只係得港台電視31先有得播」，又話「嚇到個心離一離」、「等出街嘅時間仲長過講施政報告」、「希望個page嘅likelike多到上個鼻度」。不過，曾俊華個post只係貼出有關宣傳片，無同大家分享港台節目嘅fb專頁，噚日所見港台有關節目嘅專頁僅得約300人like，似乎like數仲未可以多到上鼻。至於曾俊華本身個post，唔使6個鐘已有逾5000幾人like咗或畀「心心」等，亦有600幾人分享帖文。
|
| |
| |
;){kind=small}
;)
