【明報專訊】立法會議員每年都會就財政預算案向政府部門提出書面問題，今年全體立法會議員提出6403條問題，比舊年少咗約900條。工黨張超雄蟬聯「問題議員」榜首，繼去年提出1280條問題，今年再提出1000條。社會福利署收到最多議員提問。 今年提出最多問題嘅頭5名議員都係民主派，分別係張超雄、社福界邵家臻(379條)，公民黨郭家麒(334條)、譚文豪(321條)同陳淑莊(268條)。喺去年，社民連梁國雄同「建築、測量、都市規劃及園境界」議員姚松炎都係頭5個「問題議員」，但二人喺去年7月被DQ(取消議員資格)，今年榜上無名。 議員最關心嘅問題都以社福同教育為主，社署同教育局分別收到最多提問，前者收到698條問題，後者就有477條。立法會財委會喺下月16號開始，一連5日舉行特別會議，審核預算案嘅開支預算。 姚松炎參選立法會九龍西補選，該區候選人仲有鄭泳舜同蔡東洲。
|
| |
| |
;)
