陳茂波民望急跌 袁國強重新執業
[2018.03.30] 發表
【明報專訊】中大亞太研究所噚日公布3月份特區政府民望，上月發表《財政預算案》嘅財政司長陳茂波，平均評分為44.5分，較2月份時下跌5.1分，跌幅顯著；至於特首林鄭月娥，評分係56.2分，較2月上升0.6分，調查分析受訪者嘅背景，顯示30歲或以下、基層同中下層嘅受訪者對林太評分較其他組別低，而51歲受訪者、上層同中上層嘅受訪者評分就相對較高。
呢次調查喺本月21至26號訪問733名市民。
蘇錦樑做非執董又做顧問
另外，政府通報兩個前司局長離職後去向。前律政司長袁國強以資深大律師身分執業，係自僱人士。商務及經濟發展局前局長蘇錦樑將出任英傑華人壽保險公司獨立非執行董事，同埋喺蘇龍律師事務所做顧問。兩個都會喺4月3日(下周二)開始擔任上述工作。
前任行政長官及政治委任官員離職後工作諮詢委員會(諮詢委員會)噚日發出新聞稿，交代畀咗意見打算擔任工作同接受委任嘅袁國強同蘇錦樑。委員會認為，袁國強同蘇錦樑兩個人嘅新工作唔會構成任何潛在利益衝突，預期唔會引起公眾負面反應。
委員會話，袁國強同政府簽訂嘅合約講明，佢離開政府一年內唔可以做任何牽涉或針對政府嘅索償、訴訟、索求、法律程序、交易或談判中代表任何人，或參與有關政府事宜嘅游說工作；除非特首事先書面許可，否則唔可以使用或向任何人泄露佢擔任律政司長期間知悉嘅敏感資料等。委員會認為袁國強亦唔應該參與任何政府土地、物業、計劃、合約或專營權競投等工作。
更多港聞
相關新聞
