被指所屬律師樓與北大辦仲裁課 譚允芝話余若薇穿鑿附會
[2018.08.31] 發表
【明報專訊】香港大律師公會指兩名成員月前被拒到北京大學任教雙方合辦嘅公法課程，事件餘波未了。公會同北大同時合辦仲裁課程，前公會主席余若薇(Audrey，左圖)前日喺網台節目話，由於另一前主席譚允芝(右圖)以其所屬律師樓名義，與北大合辦仲裁課程，令到公會喺北大嘅仲裁課程鬧「雙胞胎」，北大因此要求公會調整課程內容，避免重複。譚允芝前晚先喺facebook隔空回應，噚日再接受商台訪問反駁，批評Audrey「穿鑿附會」。
譚允芝強調，仲裁課程自2017年開始授課以嚟，一直以大律師公會名義開辦，「德輔大律師事務所(譚所屬律師樓)、或我本人從沒有為北大學生開辦任何仲裁課程」，指Audrey「無中生有」。譚允芝話，北大法學院教授強世功喺2016年提及希望同公會合辦仲裁課程，但課程舉辦時，自己已退任公會主席；佢又話即使北大要求調整課程內容，亦唔出奇。
非與北大合作 律師樓北京辦研討會
有知情者亦同Emily講，譚允芝「係啱嘅」，唔明Audrey點解提出相關指控。翻查網上資料，德輔大律師事務所9月會同一個北京機構舉辦仲裁研討會，但就唔係北大，唔知Audrey係咪一時搞錯咗呢？。
Emily噚晚向Audrey查詢，仍等緊回覆。
更多港聞
【明報專訊】港大法律系副教授戴耀廷（Benny）周三喺facebook專頁向全國政協副主席、前特首梁振英（CY）下戰書，邀請對方公開討論港獨...
詳情
相關新聞
