【明報專訊】早前確診嘅馬主周巧兒前日已康復出院，因同枱飲宴而被列為密切接觸者嘅「幫港出聲」發起人周融亦已經完成檢疫，離開翠雅山房。周融話檢疫期間「無所事事」，靠睇書同做運動度日，佢透露睇緊一本關於無政府狀態嘅書，Emily好奇問有咩得着，佢就話本書太長太悶未睇完喎。 周融侄女周巧兒嘅寵物松鼠狗受「低程度感染」，引起全城關注，周巧兒群組至今共5人確診，包括佢阿哥周秉亮、兄嫂、兩名家傭。 完成檢疫呈陰性歸家 周融上周六(7日)檢疫期屆滿，佢話離開翠雅山房前已經驗咗唾液樣本，證實對病毒呈陰性，可以離開；其他親屬都未有感染情况，完成檢疫。 周融早前同Emily講，無怪責任何人，平時香港人都好忙，檢疫期間可趁機「偷得浮生兩周閒」。佢噚日就話，檢疫真係好悶，成日無所事事，「靜靜地做吓運動、睇書同傾偈」，佢透露睇緊嘅書關於無政府狀態，但未有咩得着，因為本書太長太悶；又話即使重獲自由都唔會周圍去，暫時盡量留喺屋企。
|
| |
| |
;)
