【Emily】陳梓維話留任聲明「參考」朱順雅

[2021.05.14] 發表

【明報專訊】政府通過修例，區議員將要宣誓，連日有民主派區議員表態唔宣誓以至辭職，油尖旺區議員陳梓維就表明會宣誓留任，直至本屆任期完結為止。不過，佢嘅帖文就被指同屯門朱順雅嘅聲明十分相似，有網民留言貼上朱順雅嘅聲明，陳梓維就表明「我參考佢」。新民黨李梓敬分享消息，話「維維又有新消息喇！真係好，成日為我哋帶嚟笑話，可以開心吓」。

「履行莊嚴承諾，直到任期屆滿」

睇番兩人帖文，同樣以「履行莊嚴承諾，直到任期屆滿」為標題，重疊字眼包括「宣誓一事，本屬不必」、「卸下區議員公職後，我會繼續留守香港」、「與香港人同行」、「時勢艱困，大家珍重！」

陳梓維嘅帖文亦都提到，明白區議會經常畀民政專員以違反《區議會條例》61條為由，禁止討論民生議題，形容前路難行，但街坊不願走回頭路、鼓勵佢繼續地區工作。社工熊百祥就留言問佢「擴張句子練習？」

另亦有網民寄語佢守穩個社區、點都唔好畀建制上；亦有人話佢做到區議員絕對係奇蹟，「咁點會輕易放棄呢啲收入呀」。