【Emily】梁美芬搞壁畫 邀劏房童畫Dream House
[2021.08.30] 發表
【明報專訊】港澳辦主任夏寶龍早前關注香港劏房籠屋問題，經民聯立法會議員梁美芬早排同多個團體發起平台「凝聚民心」，搞咗一個大型壁畫活動，由幾十個住喺劏房嘅小朋友，畫出自己理想居所嘅構圖，然後拼合成為壁畫。梁美芬話，為咗了解住戶睇法，團隊走訪咗約100戶檔房、板間房及籠屋。
主辦單位噚日搵咗民政事務局長徐英偉，聯同參與嘅基層學生為壁畫上色。壁畫結合畫家設計及基層小朋友心聲，如圖中有個女仔坐喺地拖上飛行，原稿由一名住劏房嘅女孩畫出嚟，係想講小女孩盼衝出所住嘅劏房。
梁美芬話，自己3歲之前，一家六口住喺油麻地板間房，日前佢探訪劏房戶，見到小妹妹喺碌架牀爬上爬落玩，勾起自己唔少回憶，佢話極不願見到問題幾十年後一直拖延下去，既然中央都開腔要香港告別籠屋劏房，港府要用靈活思維考慮各種建議，包括加快重建舊公屋，增加公屋供應。
更多港聞
相關新聞
