【Emily】8000萬中秋金多寶 正日攪珠
[2021.09.21] 發表
【明報專訊】8000萬元六合彩中秋金多寶今晚攪珠，如果10元一注中頭獎，幸運兒可捧走8000萬元，過一個歡樂中秋。唔講唔知，呢類「節日金多寶」，攪珠日期甚少喺節日正日舉行，今次中秋金多寶撞啱喺農曆八月十五日攪珠，原來係歷來第二次。
Emily睇番賽馬會資料，中秋金多寶攪珠由1997年舉行至今，除咗今次之外，只係喺2013年嗰一期先至喺中秋節晚上舉行，咁啱嗰期攪珠頭獎都有8000萬元，最後只得半注中，其餘大部分都喺中秋節前攪珠，2011年先至喺農曆八月十六日追月夜舉行。再睇番最近5次中秋金多寶攪珠結果，馬會話有8名幸運兒中頭獎，當中6人以複式彩票買中；而歷來中秋金多寶，7同15號攪出次數最多，分別有10次同9次，唔知大家又揀唔揀到心水號碼呢？
更多港聞
相關新聞
