【Emily】陳智思接掌M+ 商界4人入局
[2022.03.28] 發表
【明報專訊】Emily收到消息，位於西九文化區嘅M+博物館，董事局將有人事變動，行政會議召集人陳智思(圖)自4月1日起會接替已經做咗6年嘅金山工業(集團)有限公司主席兼總裁羅仲榮，擔任M+董事局主席。主席換人係咪代表M+有新變化，特別係外界擔心M+展品會有審查？據悉，現行政策係展覽由策展人負責，以專業、持平同客觀態度去策展，唔涉其他考慮，但亦會確保守法，收藏政策符合國際最高標準，消息人士話呢啲政策唔會因為董事局有人事變動而有變化。
不過，消息話M+希望變得更貼地、大眾化，主席上任後要尋找M+嘅「business model」。另外，據了解，香港故宮文化博物館工程將於今年內如期完成，而且不超支。
消息：要尋「business model」
陳智思畢業於美國加州波莫納學院(Pomona College)藝術系，做過唔少相關公職，例如係古物諮詢委員會主席、活化歷史建築諮詢委員會主席等等。據了解，M+董事局今次共有5人離任，除羅仲榮，仲有副主席羅榮生，成員羅啟妍、高思雅和龐俊怡，另外新加入嘅4名成員都係有商界背景，包括中銀香港獨立非執行董事馮婉眉等。據了解，陳智思上任後面對嘅挑戰包括要幫M+開源，將來門票一定要收費，仲有專題展覽；外國一啲大型展覽有商業機構贊助係平常事，呢點就要新主席利用自己嘅網絡去提升有關贊助。
此外，據悉M+工程有可能超支，雖然工程唔係主席嘅職責，但相信新主席上場都無可避免要面對外界嘅質詢。
更多港聞
【Emily】保安員賴紅梅參選特首 話受聖經啟示
【明報專訊】特首選舉提名期4月3日展開，報稱任職保安員嘅賴紅梅噚日開記者會宣布參選，佢自稱基督徒，表示參選得到《聖經》啟示。對於爭取選委提名... 詳情
【明報專訊】第五波新冠疫情期間唔少人感染，坊間有人戲稱康復者好似經典電子遊戲「孖寶兄弟」咁食咗「星星」，有抗體「星星」，短暫唔怕再次感染。民...
詳情
【明報專訊】勞工處將於本周三、周四（30及31日）喺網上舉行「職場新機遇網上招聘會」，提供超過2500個職位空缺，主要包括物業管理、飲食業及...
詳情
相關新聞
