【Emily】港鐵聽日半價 九巴書展擺攤
[2025.07.12] 發表
【明報專訊】港鐵因應5月將軍澳線故障停駛，根據票價調整機制嘅「服務表現回贈」，安排連同帳戶嘅累積款項撥出1920萬元，喺聽日搞「感謝日」，全日坐車半價，包括東鐵線羅湖同落馬洲站嘅過境車程。
港鐵半價限於用八達通坐港鐵、輕鐵及行走新界西北路線嘅港鐵巴士，或用車票二維碼坐重鐵，亦可以同轉乘優惠、特惠站及全月通連接車程七五折優惠同時使用。東鐵線頭等車廂、機場快線、港鐵接駁巴士、用實體或電子單程票、信用卡或扣帳卡嘅車程、高鐵就唔包括在內。
至於九巴今年嘅「夏日賞童遊」，除咗7月、8月每逢星期日小童可以免費坐車，仲有兩架黃色為主調嘅活動主題巴士，聽日上下晝分別泊喺屯門市中心同大圍總站，畀大家影相打卡。另外，下星期舉行嘅書展，九巴會擺攤位，到時會有新推出嘅巴士模型同精品，以及全新桌上遊戲「九巴遊香港」發售。
更多港聞
相關新聞
