【Emily】警首部微短劇播出 一哥：學堂回憶湧現
[2025.08.30] 發表
【明報專訊】警方推出首部微短劇《郭Sir！學警A班到齊！》，噚日及下周二(9月2日)分別喺警方抖音帳戶及YouTube頻道分集播出。呢套微短劇共25集，每集約3分鐘，講述由演員王浩信飾演嘅「神探」警署警長調任到警察訓練學院，協助學警完成27周訓練，其間仲偵破咗一宗懸案。
呢套微短劇主要喺黃竹坑警察學院實地取景，仲有石修及黃嘉樂等演員同現役警員客串演出。警方噚日喺灣仔警察總部舉辦首映會，警務處長周一鳴致辭話，期望微短劇增加大眾認識警員工作，並有興趣加入警隊。
周又提到，睇呢套微短劇令佢當年喺「學堂」受訓嘅回憶湧現，仲講笑話一直唔明白點解朝早起身要收拾牀鋪，但佢至今仍維持呢個習慣。
更多港聞
相關新聞
