【明報專訊】香港青年時事評論員協會(青評會)噚日又搞政改論壇，又有一啲熟口熟面嘅撐政府者捧場，其中一個「熱心」支持者係上星期被拒入《城市論壇》嘅仁兄！呢個男子每逢泛民代表發言就喝倒彩，一到建制派講者發言就振臂高呼，多次打斷講者發言，搞到本身係講者嘅青評會主席周浩鼎都要「分身」，帶呢個支持者出場安撫對方。 噚日青評會喺灣仔一間酒店搞政改論壇，民主黨副主席蔡耀昌、民協馮檢基同公共專業聯盟副主席吳永輝都有出席，蔡耀昌同馮檢基一開聲就遭台下觀眾噓。蔡耀昌同吳永輝離開時就被撐政府者一直跟住過馬路，沿途高聲大罵。 其實青評會論壇獲撐政府者捧場唔係新鮮事，上年前愛港力召集人陳淨心出席青評會論壇時，就因為太肉緊，突然企喺嘉賓枱上高舉國旗，仲令論壇腰斷，之後周浩鼎話日後未必邀請愛港力出席活動。但周浩鼎噚日嘆道，其實佢哋噚日無特別邀請撐政府者到場，之不過論壇大門打開，無理由唔畀聽眾入場啫。
|
| |
| |
;){kind=small}
