【明報專訊】母親節(5月10號)就快到，唔少仔女要諗定點樣孝敬媽媽，根據噚日facebook公布嘅數字，原來有用facebook嘅港媽當中，四成有add自己嘅仔女，但鄰近嘅台灣就高達八成媽媽有add仔女﹗Emily仲見到有朋友即刻接獲媽媽「好友邀請」?。 母親節前後愛睇時裝專頁 根據facebook舊年統計，香港用戶喺母親節當日提及「母親」一詞總數有成95,000幾次，比平時多出2.5倍。facebook仲發現仔女喺母親節最常送鮮花畀媽媽；其次就係計劃同媽媽出街食大餐，或者請媽媽去旅行。至於媽媽級用戶喺母親節前後，最留意奢侈品牌、時裝同名人嘅專頁，仔女們要識做啦。 愈來愈多媽媽同仔女喺網上互動，原來「老友記」都愈來愈醒目，唔少都識用智能手機同後生仔溝通，好似統計處噚日公布上年6月至8月份嘅統計數字，發現每4個65歲或以上長者當中，就有1個擁有智能手機，相比2012年同類調查，每100個長者只有7個有智能手機，比例上升咗唔少。
|
| |
| |
