【明報專訊】噚日下午檢討TSA委員會開會，教育局長吳克儉未有出席，但就去咗日本人俱樂部，同一班即將去日本嘅香港學生分享自己遊日心得。早排佢放假唔出席立法會TSA公聽會畀人批評，吳克儉就同學生講，最近去咗東京，仲專登去東京大學，大讚東京有兩個公園好靚，「個湖邊好靚，夜晚睇星好靚，啲紅葉影咗啲燈好唔同」。 吳克儉早前話自己每月睇30本書同雜誌，雖然唔識日文，喺日本都會花成個鐘喺報攤同書店，仲話「上次買咗6本雜誌」，「你會覺得好有趣、好刺激」；佢甚至對日本學生「情有獨鍾」，大爆自己第一次去日本，喺車入面「望住啲著制服嘅學生」，走去同人傾偈，「我慢慢講，佢哋就聽得到啲，有時我用動作去表達，用啲body language」。除咗睇書同撩日本學生傾偈，吳克儉亦提供飲食攻略，推介學生去超級市場食嘢。
|
| |
| |
