【明報專訊】特首梁振英(CY)一家捲入行李風波，至今未平息，港區人大代表、保安局前局長李少光噚日出席DBC電台節目時點評事件，形容特首夫人出於愛護子女，有時表現係「真性情出咗嚟」，話梁太可能想運用「普通市民權利」幫女兒；而子女有事，父母一定心急幫忙，唔可以怪梁太，但介入程度可思考一下。 「可能想用普通市民權利幫女兒」 李少光話，事件中CY女兒遺失嘅行李後來經過好嚴格程序先送番畀佢，所以所謂危害飛機安全並唔存在，事件焦點係行使特權，但佢話過往亦有類似案例，認為今次非獨立事件，主要因為事主係CY，認為唔應該過度炒作。佢話今年係選舉年，任何事都會畀人拎嚟炒作，不過佢都同意如果處理手法好啲，其他人就炒作少啲，又話官員同其家人嘅權利係少啲。 對於前港區人大代表朱幼麟喺行李風波「大爆內幕」，李少光覺得可能涉及朱、梁之前「有啲唔係幾好嘅事」，係個人恩怨。
|
| |
| |
