【明報專訊】港大民研計劃噚日公布一項調查結果，發現香港人對「自己人」嘅好感淨值得28個百分點，跌至2007年調查開展以來嘅新低，而且好感度仲低過對台灣人同澳門人，港人對呢兩個地方嘅人民好感淨值，分別有56個百分點同48個百分點，唔通真係「隔籬飯香」？而港人對內地人嘅好感淨值就只得8個百分點。 「自己人」好感淨值跌至新低 民研計劃今個月透過真實訪員以隨機抽樣方式，訪問港人對各地政府同人民嘅觀感調查，問佢哋對「XX人民/政府有幾好感或者反感呢？」結果顯示，港人對各地人民嘅好感淨值都高過對當地政府，以香港為例，港人對人民嘅好感度有28個百分點、對政府為負17，相差45個百分點；對台灣人比當地政府高41個百分點、對內地人比中央政府就高14個百分點。 另外，香港人對日韓、美國等地政府都係反感居多，對人民就滿有好感。但調查無解釋背後原因，話讀者可以根據民研嘅「民意日誌」自行判斷。
|
| |
| |
