【明報專訊】Emily噚日提及facebook瘋傳一張清潔工喺旺角一個公廁內用膳嘅照片，並有多人標籤(tag)特首林鄭月娥，要求佢關注事件；食環署噚日回覆本報查詢，話清潔工喺公廁內進食係「不衛生亦不適當」，會勸喻佢到合適地點進食。 食環署話，涉事「廁所事務員」係夜更外判員工，因工時較短，所以未如日更人員有一個鐘用膳時間，但有小休時間進食。署方話佢可以喺當值期間，喺公廁值勤室、公廁旁嘅承辦商員工點名室兼休息室，或附近公園小休同進食，但據署方了解，涉事員工事發時因為附近公園太多人，所以選擇公廁內進食。 網民似乎唔多滿意食環署呢個回覆，有網民指該清潔工係外判制度下嘅受害者，質疑點解係佢違規；亦有人批評「有得揀邊個會揀喺公廁食飯？講到人自己揀咁」；亦有網民反問，食環署又有無向清潔工提供「適當又衛生」嘅地方畀佢用膳呢？
|
| |
| |
