【明報專訊】民主動力早前話區選協調名單上有約360人，部分獲推薦出戰嘅參選人喺橫額上印上「唯一民主派支持參選人」字樣；熱血公民立法會議員鄭松泰(泰博)質疑，做法係排斥不願歸邊嘅人或組織，不談政治綱領。 橫額印「唯一民主派支持參選人」 泰博前日喺facebook上載一張橫額，上面印有「田景區唯一民主派支持參選人」字樣，泰博質疑做法係蒙蔽群眾、叫人認住logo就支持。目前田景區已報名嘅包括工聯會區議員李洪森、熱血公民梁逸朗，同埋報稱獨立民主派嘅梁灝文。民主動力召集人趙家賢解釋，梁灝文係由地區友好推薦加入機制，佢有做地區工作，亦認同民主派理念咁話。 民主派多區都「撞區」，馬鞍山市中心有工黨吳惠靈、「馬鞍山人」鍾禮謙，二人噚日喺區內舉行初選，以收集提名數量決定邊個出線。最終由鍾禮謙代表民主派出戰。 初選期間，吳惠靈搵嚟工黨主席郭永健站台。曾經係學民思潮成員嘅鍾禮謙就有多名前學民仔女撐場，包括香港眾志秘書長黃之鋒、成員周庭等；立法會議員陳志全亦都現身站台。 該區目前已報名嘅參選人包括當區區議員李子榮、社區主任邱文勁，同埋報稱校長嘅李啟雄。
|
| |
| |
