「體育王子」伍家謙離無綫
周五告別 慶幸兌恩師承諾
[2014.11.25] 發表
【明報專訊】被人稱為「無綫體育新聞王子」嘅無綫體育記者伍家謙，噚日喺facebook透露已經辭職，準備離開呢個做咗11年零3個月嘅崗位，仲會喺星期五(28日)嘅11點晚間新聞正式告別觀眾。今次離開，佢話慶幸能夠兌現對已故恩師伍晃榮嘅承諾，唔係「做半年一年就走咗去」，但佢遺憾6點半新聞取消體育新聞環節，憶起恩師講過「未能把體育帶到更受人關注的層面，是我們的過失」，覺得責無旁貸。
遺憾體育新聞環節取消
由大學二年級已經開始兼職體育記者嘅伍家謙，由《新報》開始，轉到亞洲電視實習，再喺畢業後轉職無綫，入行唔經唔覺近14年。早前無綫新聞部發起聯署公開信，抗議管理層修改7警涉打被捕者嘅報道字眼，伍家謙都有聲援。但選擇喺呢個時候離開，佢話「與其他一切都沒有關係，純粹是希望自己在事業上有些轉變」。
回顧過去十幾年，伍家謙話「劉翔在我面前經過數十次；高比拜仁，我跟他做過六、七次訪問……」，每次都似「中了頭獎般」幸運；但就遺憾新聞時間有限，「體育新聞往往成為被裁的第一選擇，播出時間壓縮再壓縮」，仲畀途人問佢係咪「唔使點做」，感覺好難受。
轉型自由工作 「一生離不開體育」
不過「世事豈能盡如人意，但求無愧於心」，伍家謙除咗慶幸過去下筆嘅「每一隻字」都可以「全憑良心」，亦高興能夠兌現對恩師嘅承諾，透露當年面試尾聲，伍晃榮曾經同佢講「你唔好同我做半年一年就走咗去呀吓」。
「伍家謙，交畀你講體育！」暫成絕唱，但佢話未來仍會喺體育界努力，只係會轉型為自由身工作者，「我想我一生都離不開體育」。
更多港聞
【明報專訊】網上流傳一張旺角百老匯電器售貨員喺店外街頭「排排企」相片，被指係職員跑唔夠數遭「罰企」。百老匯噚日回覆查詢時承認，分店主管曾喺店...
詳情
【明報專訊】雜誌《100毛》創辦人林日曦因為好欣賞民建聯立法會議員蔣麗芸（Ann 姐）喺立法會嘅發言，話為大家帶來歡樂，仲可以啟發年輕人，所...
詳情
相關新聞
