【明報專訊】今年立法會復會以來，人民力量同社民連等為咗喺議會內抗爭，經常使用點算人數嘅招數，搞到好多議員都食唔安，要衝返會議廳坐定定，又試過幾次差啲流會。但噚日大家可以食餐安樂茶飯，因為社民連梁國雄(長毛)喺旺角被拘捕、人力陳偉業(大嚿)噚日一早就被主席曾鈺成驅趕出會議廳，點人數次數即時少咗，所以建制派議員笑言噚日收少好多點人數嘅「追魂call」。 長毛因被捕噚日開唔到會；大嚿就因為喺立法會質疑環節，明明係討論關於馬拉松活動籌辦事項嘅時候，乘機譴責警方喺旺角嘅行動，怒斥警方無遵守法院嘅禁制令。不過，大嚿指住民政事務局長曾德成，怒罵警務處長曾偉雄，就被主席曾鈺成裁定違反議事規則，要暫停會議，然後趕走大嚿。 大嚿就強調，要喺議事堂反映市民被打穿頭嘅實况，又自圓其說話體育、民生同政治都有關，必須借機會譴責警方喎。
|
| |
| |
;)
