旺角現持武橫額諷警
田北辰：示威者挑釁博影相
[2014.12.22] 發表
【明報專訊】警務處長曾偉雄前日喺無綫電視專訪中話，10月3號旺角衝突中有女警以身體擋住反佔領者、保護學生離開，好似慈母保護兒女咁，此言一出，噚日旺角亞皆老街通往火車站嘅行人天橋就出現一幅寫有「慈母？持武。」嘅橫額，似諷刺警方用武力對待示威者。
曾偉雄都有知音㗎，新民黨副主席田北辰噚日就喺商台《政好星期天》節目話戥警察唔抵，因為拖咗好耐先清場，警察無得即時拘捕違法佔領者，要一路啞忍，真係有苦自己知。田二少仲鬧佔領學生以極之影響他人利益嘅手法，表達不符合憲制嘅訴求，係有姿勢無實際、自私兼意氣用事，又話反映咗政府對青少年做嘅一國兩制教育失敗。田二少仲話有啲示威者想挑釁警員，「我知佢挑釁做咩，博一張相嘛！」
黃碧雲：慈母手中棍
不過，民主黨黃碧雲就喺facebook言簡意賅咁回應曾偉雄，留言話﹕「慈母手中棍！？」
雖然佔領基本上已完結，但黃色橫額噚日又遍地開花，油麻地、荃灣、鰂魚涌都有行人天橋掛咗「傘不散一直撐」橫額，馬料水就有「error 689」橫額諷刺特首梁振英，仲有各區拆而不絕嘅「我要真普選」橫額，有啲市民一見到就報案，睇嚟香港嘅「慈母」有排唔得閒。
市民便利貼重建「連儂牆」
至於喺佔領期間成為民主牆嘅金鐘政總外嘅「連儂牆」，喺清場後不斷有人重返，好似噚日下晝，就有市民用便利貼重建連儂牆，話繼續支持港人爭取真普選。
更多港聞
【明報專訊】學校已經放緊聖誕新年長假，網上好多白領一族亦「教路」話，只需申請周一至周三放假，就可以享有9日悠長假期，唔怪得唔少人已經飛咗去外...
詳情
相關新聞
