【明報專訊】有網友投訴，話位於尖沙嘴The One嘅西班牙菜海鮮酒吧TAPAGRIA阻止遊客拍攝該店景觀；TAPAGRIA回覆Emily時確認有此事，話會再與相關員工溝通。 有網友喺facebook發文話，前晚於尖沙嘴晚飯後，與外國朋友走到The One，等候升降機期間，朋友睇到TAPAGRIA景觀甚佳，讚歎香港夜景之美，於是舉手機拍攝，但被門口嘅侍應阻止。TAPAGRIA向Emily解釋，拍照者未有通知接待處人員就舉機影相，而接待處人員可能「緊張咗啲」，「reception(嘅員工)淨係識講英文，中文唔係話好靈光，可能比較緊張啲，表達方式出咗問題」。 律師：無權阻止門口拍攝 TAPAGRIA又話公司政策係「唔可以影到食客」，加上曾經有食客投訴被影相，所以𠵱家「唔可以喺門口度就咁影相」，以免騷擾食客，「你入嚟食嘢影吓海景係可以嘅，但如果你話喺門口(影相)，因為始終我哋係餐廳，唔係話觀光名勝嘅地方」。問到餐廳門口到升降機範圍係咪屬該餐廳所有，TAPAGRIA就話要再了解。不過，律師黃國桐回覆我哋時就話餐廳無權阻市民喺門口拍攝嘅，「(影相)你權利嚟㗎嘛」。至於拍攝到私人地方，佢話﹕「咩私人地方？出面影入去㗎嘛，如果咁私人地方，你咪遮咗佢囉。」
|
| |
| |
;){kind=small}
;)
