【明報專訊】特首梁振英(CY)自從開咗個facebook戶口，一路都引起好多關注，但要加佢做「朋友」就唔係咁容易。究竟特首會加咩人做「朋友」呢？《壹週刊》就報道，上星期平安夜，CY fb 400幾人嘅朋友名單突然彈出，仲發現帳戶原來一路都追蹤住一班低胸性感嘅台灣女子。 特首辦已報警 Emily見到就問吓特首辦，特首辦就話CY個fb於12月24日下晝懷疑被黑客入侵，部分資料及設定仲畀人改過，仲話畀人加咗啲「新朋友」，當日已經報咗警；但特首辦聲明就無交代呢班性感台灣女子係咪佢「朋友」，只係話部分資料及設定被他人修改、部分帖文被他人刪除、「被他人加入一些『新朋友』」。 不過，Emily就見到網民Andy喺自己fb上載咗張截圖，話CY嘅fb原來於11月已經加咗幾個台灣妹做「朋友」。呢位網民同Emily講，話CY一開fb，佢就想加CY做朋友，雖然CY無接受邀請，但唔知點解11月時佢就喺fb嘅「建議朋友」見到3個台灣妹用戶，仲寫住「friends with CY」，佢覺得幾得意，就cap咗圖同朋友笑吓。 特首辦話CY嘅fb平安夜畀黑客入侵，先加咗啲新朋友，Andy話佢「見到就笑咗出嚟」，於是就推番11月當日嘅cap圖出嚟。特首辦回應話，單案警方查緊，暫時無進一步資料可以提供。 警方就話，當日收到特首辦報案，單案列咗做「有犯罪或不誠實意圖而取用電腦」，交由網絡安全及科技罪案調查科跟進調查。
|
| |
| |
;){kind=small}
;)
