自稱總商會會員 暗批林健鋒缺席辯論

自稱總商會會員暗批林健鋒缺席辯論

[2016.08.18] 發表

【明報專訊】立法會多個功能組別選情競爭激烈，好似屬於總商會嘅商界(第一)就由經民聯林健鋒與自由黨陳浩濂對戰，但至今未有選舉論壇舉行，噚日就有聲稱代表「一群香港總商會會員」向傳媒發信，不點名批評林健鋒刻意缺席所有選舉論壇，連總商會搞嘅都唔肯去。

有份寫呢封信嘅總商會會員蔡先生話，封信係代表40個會員，佢哋全部都係中小企，指對於林健鋒唔肯出席論壇，甚至總商會搞嘅都唔肯去係「有啲過分」，認為如果兩個候選人同場辯論，會員可比較兩個候選人，因為辯論係令選民最有效了解候選人並作選擇嘅渠道。呢封信寫明，「強烈要求有關候選人改變其拒絕參與選舉論壇的立場，並向大眾及各會員清晰其參選論述，否則他將要面臨失去相關議席」。蔡生話由於林健鋒唔肯面對選民，所以唯有發出公開信。

總商會回覆Emily話，早前因應會員要求，同兩個候選人接洽，如雙方達成共識，總商會將提供支援服務促成選舉論壇。總商會最終分別喺22日同31日舉行論壇，不過兩名候選人係分別同會員交流，22日係陳浩濂出席，31日係林健鋒出席。

林健鋒：失望有人抹黑

陳浩濂話自己接受所有選舉論壇邀請，但有關機構指另一候選人唔肯參加所以未能進行。林健鋒回應稱最重要係向選民介紹政綱，強調自己多年來為商會服務，唔係呢幾個月先出嚟關心商界，又話「對於有人多次以抹黑手段，惡意攻擊，感到非常失望」。