【明報專訊】卓韻芝一連三場《風大雨大One Night Stand》棟篤笑前晚開騷，彭浩翔、Ben Sir(歐陽偉豪)、林日曦及卓韻芝外婆等捧場。卓韻芝(阿芝)台上話題涉及特首及社會，最近想北上學浮潛的阿芝笑言，不知會否因此返不到內地。不過最激還是講到愛情、婆媳糾紛及自己外婆，阿芝更突然出櫃，自爆有女朋友。

卓韻芝在台上連環大爆中英文粗口後，突然當眾宣布『出櫃』，她說：「話說我近排拍拖，而對方是一個女仔！一直在想如何跟阿婆講，於是有日幫她摺衫，趁機會講那個女仔朋友其實是我女朋友，阿婆第一個反應就話：『佢無棍喎﹗你唔驚呀？』我就話唔驚，有兩碌棍就驚，阿婆話這個年代無乜所謂，反過來安慰我，多謝婆婆﹗」阿芝大讚外婆犀利，從這件事看到對方去到一個無所謂境界，輕鬆面對所有事情，世界沒有事情值得去煩。最後，阿芝以創作歌曲《竟紅二汶》結尾，不知是否公開了新戀情，她興奮得除下高跟鞋來唱。

讚婆婆氣量女友圈外人

阿芝完騷受訪即被追問新女朋友有否捧場，她說：「有，當然要來睇下及打點下！(拍拖多久？)剛開始不久，但認識好耐。(對方是否圈內人？)不是圈內人，如果是明星會同大家講。(為何選擇這晚公布？)其實我不想自爆，只不過這件事代表我對婆婆的尊敬，我想過她有好多件事去講，但無一件事可以講得到她的氣量，如何去接受所有事情，記得和她講完差點感動到喊。(有帶女朋友見婆婆？)大家識，她一直是我朋友，覺得更加無需要去隱瞞，不如直接講。」

自嘲追不到女的雙性戀者

至於性取向為何突然轉彎？阿芝表示：「不知道，大家認識好耐，突然有一刻覺得自己可能鍾意了她，有少少後知後覺。(對方好大吸引力？)在我心目中她當然好靚，記得自己細個都有鍾意人，暗戀女同學，但我是一個追求不到女性的雙性戀者，緣分到就順住去。(是你開口話一齊？)係呀﹗(當時如何表白？)最典型那些，我好似鍾意你，老土又有點驚驚地。(女朋友一直喜歡女仔？)不要公布她的事情，她有她的另一面，總之是我自己開口去問得唔得。(出街會有很多人影？)現在世界無乜所謂，學婆婆做人輕輕鬆鬆，無咁多煩惱，都唔驚啦，有何韻詩幫我們頂住。(已向對方暗示結婚？)咁又未，純粹拍拖先，感受一下，睇緣分如何。」

記者：梁榮達