阿廸發動致函運署 跟進其他巴士線
[2019.07.06] 發表
【明報專訊】反對《逃犯條例》修例示威者6月21日包圍警察總部至翌日凌晨，九巴當時開出特別班次104R線，由警總外軒尼詩道往旺角，運輸署之後要求九巴「詳細交代」當晚安排，被批評係白色恐怖。議會陣線朱凱廸噚日喺facebook發起行動，形容運輸署「咁得閒不務正業」，呼籲市民去信署方，要求跟進其他巴士路線嘅服務問題，更提供範本畀網民參考。
朱凱廸嘅範本信件開首就講到，「本人認為， 貴署毋須跟進104R，應跟進以下路線，以解市民日常之苦」，之後就填上市民關心嘅巴士線、現况同市民要求，收件人包括運輸署長陳美寶在內嘅10幾名署方高層官員；帖文半日已吸到逾1800個讚好。有網民支持九巴「隨時作出巴士特別班安排」，但有網民覺得若叫運輸署跟進其他路線，只會畀署方「有位入(九巴)」。
民主黨涂謹申噚日就運輸署舉動發聲明，批評政府不知悔改，「一直透過不同手段趕盡殺絕，連讓香港市民返家都要阻撓，是與民為敵」。
更多港聞
相關新聞
