【Emily】張超雄椎間盤突出入院
[2019.10.15] 發表
【明報專訊】反修例運動風波未息，立法會議員除咗「落場」，仲要日日回應事態，好易捱出病。工黨立法會議員張超雄噚日喺facebook上載咗一張病牀相，話自己已經病咗兩星期，已入院兩日，經醫生診斷係椎間盤突出要臥牀休息。超雄話自己最初只係感冒咳嗽，到後來咳得太勁，咳到腰痛腳痛，連落牀都有困難之下唯有叫白車。
身在醫院嘅超雄心繫立法會，佢話上周五嘅財會和內會，以及噚日嘅財會，自己都無法出席，希望可以盡快康復，返回崗位同大家一起抗爭。
其實超雄唔係第一次整親條腰，今年3月，佢因為扭傷要夤夜入急症室，連去立法會開會都要坐輪椅，當時會議討論佢提出嘅「立法保障罕見疾病的病人權益」無約束力議案，唯有忍住痛都要上陣。Emily祝超雄早日康復。
更多港聞
【明報專訊】反修例運動獲國際關注，香港眾志成員如羅冠聰、黃之鋒、周庭亦不時到外國講解及宣傳，噚日眾志喺facebook出帖話要進一步放眼世界...
詳情
【明報專訊】反修例風波下通識教育科備受爭議。政府日前刊憲，罕有地任命課程發展處通識教育組全組11名課程發展主任為督學。督學可到校重點視學、觀...
詳情
相關新聞
