【Emily】李梓敬笑新西蘭 何桂藍批抽錯水
[2020.08.14] 發表
【明報專訊】新西蘭外長周日聯同其他4國發聲明，「嚴正關注」港府唔成比例咁押後立法會選舉。新民黨李梓敬喺facebook發文，批評新西蘭嗰頭發完聲明，過兩日就因為有4宗新冠病毒新增個案，總理阿德恩話有可能押後國會大選。參選新界東但被選舉主任DQ嘅《立場新聞》前記者何桂藍喺fb揶揄，李梓敬抽親水都抽着火水，指新西蘭奧克蘭因新增個案而採取封城措施，睇番香港，「每日過百確診嘅時候，香港政府做緊咩？」
翻查資料，新西蘭再現本土確診個案後，奧克蘭封城3日。民眾除非有必要出門，否則應留喺屋企，當地有警察設路障阻止民眾離城，超市部分主要食糧要配給發售，而衛生部門已封鎖全國嘅護老院，以防大規模爆疫。
何桂藍話當地4宗確診已經咁大動作處理，務求將病毒撲滅於萌芽，但本港確診稍為回落，政府就宣布恢復內地經香港轉機；又話李梓敬想笑人雙重標準，攞新西蘭嚟比，真係比死人。何桂藍話不如問吓港府，逼啲打工仔喺公園食飯都做得出，但就話選舉危險，搵邊個信真係防疫呀。
更多港聞
【Emily】稱無外國護照 薛永恒：好可能死於斯
【明報專訊】美國早前宣布就《港區國安法》制裁11名中港官員，創新及科技局長薛永恒噚日現身民建聯立法會議員葛珮帆（EQ）嘅YouTube節目，... 詳情
【Emily】警上載推輪椅相 阿sir企位惹猜疑
【明報專訊】香港警察前日喺Instagram上載咗一張相，係落雨期間一名警員推住坐輪椅男子前行嘅背影，但因為警員推輪椅時唔係企正喺輪椅後面，... 詳情相關新聞
