【Emily】劏房租管委會 叫錯「謝泳舜」 想叫陳振英 張宇人：嗰個叫咩
[2021.07.24] 發表
【明報專訊】立法會雖然休會3周抖暑，但仍有多條法例要審議，噚日就召開咗商討劏房租管嘅《2021業主與租客(綜合)(修訂)條例草案》法案委員會會議，議程只得選舉正、副主席，但都有蝦碌場面。
話說主持會議嘅自由黨張宇人，一開始就叫錯獲提名主席嘅民建聯鄭泳舜做「謝泳舜」，金融界議員陳振英和議時，張宇人一度表示「嗰個叫咩呀……陳振英呀」，佢仲話因為陳振英坐得太遠、睇佢唔到，「覺得(認得)你姓陳已經好威㗎喇，去到咁遠，你坐咁遠做乜？」最終無人競爭下，鄭泳舜當選主席。
張問陳：你坐咁遠做乜？
雖然立法會大會休會數周，但鄭泳舜話條例多人關心，會同運輸及房屋局商討安排一至兩次會議先。民建聯柯創盛話希望有途徑畀公眾畀意見。張宇人就話，市民網上發表意見，政府都可以回應，覺得不應偏離做法。鄭泳舜就話最基本會邀請公眾提交意見，包括經立法會網站提交。
另外，有關律政人員可以獲委任為資深大律師嘅《2021法律執業者(修訂)條例草案》噚日亦召開首次委員會會議，由新民黨容海恩當選主席，整個會議只歷時兩分鐘，極速完結。
更多港聞
【明報專訊】立法會人事編制小組委員會噚日討論開設公務員學院院長職位，金融服務界議員張華峰「發炮」，話部分公務員喺前年反修例風波及去年抗疫表現...
詳情
【明報專訊】本港有超過四成人已經打咗第一劑新型冠狀病毒疫苗，為咗推高接種率，近期唔少機構都推出疫苗抽獎，香港戲院商會噚日宣布推出打針抽戲飛計...
詳情
相關新聞
