【Emily】倡圖書館做打卡點遭改殯儀館 容海恩及am730譴責
[2025.05.24] 發表
【明報專訊】新民黨立法會議員容海恩(Eunice)日前喺立法會大會提出將圖書館發展成為旅遊「打卡點」。有網民將相關報道「改圖」，話Eunice建議將殯儀館發展成「打卡點」，張圖仲附有報章《am730》標誌。《am730》同Eunice分別譴責惡意改圖者，雙方都話會保留法律追究權利。
文體旅局長羅淑佩當時話會研究圖書館點樣設計得更新穎，但要小心太過熱鬧。Eunice嘅建議引起網民討論，有人惡搞《am730》當時報道嘅配圖，由原本提及「容海恩倡圖書館發展成旅遊打卡點」改成「容海恩倡殯儀館發展成旅遊打卡點」，背景圖片移花接木，由圖書館改為喪禮，並保留原圖引述Eunice話女兒「日日去嗰度玩」。改圖喺社交媒體流傳，Emily見到都覺得難分真假。
Eunice噚日喺facebook發帖，批評有人惡意偽造、篡改佢嘅公開言論，散佈虛假資訊欲誤導公眾，呼籲大家唔好轉載。
更多港聞
相關新聞
