【Emily】唐氏自閉患者 跟韓領館學跆拳道
[2025.07.08] 發表
【明報專訊】韓國駐香港總領事館、香港韓人商工會日前合辦社區活動，安排韓國跆拳道大師及廚師，去到本地機構「LOVE 21」會址，跟本港唐氏綜合症及自閉症患者，同埋佢哋嘅家長一齊學習跆拳道基本動作，又一齊炮製韓式紫菜包飯同炒年糕。
活動約有120人出席。跆拳道活動上，一眾參加者學習跆拳道禮儀、紮馬步、出拳同踢腿，仲示範以韓國流行兒歌Baby Shark為背景、混合跆拳道拳法嘅舞蹈。師傅鼓勵參加者要永不放棄、要充滿信心咁全力以赴。
另一邊廂，有廚師就同一班參加者製作韓式紫菜包飯同炒年糕。一眾家長邊整邊傾偈交流，仲講笑話下次要學韓式化妝技術𠻹！
韓國駐港總領事柳泂喆話，希望活動可以加強韓國同香港社區之間嘅聯繫，亦成為雙方加深友誼、合作同理解嘅契機。
更多港聞
【明報專訊】民政事務總署轄下有20間民政諮詢中心，畀市民查詢有關政府各類服務嘅資料，同埋提供宣誓服務。民政總署噚日話，本月14日至下月8日會...
詳情
【明報專訊】「長者醫療券大灣區試點計劃」現有15間醫院或醫療機構參加，部分暫未開展服務，當局噚日公布再多4間分別位於中山、廣州同佛山嘅醫院，...
詳情
相關新聞
