【Emily】九成人赴宴 好友風雨下做「柴可夫」 10號波下完婚 賓客祝打風打唔甩
[2025.07.22] 發表
【明報專訊】颱風「韋帕」周日襲港，假日活動紛紛停擺，但就無阻一對新人辦婚禮。Joe同新娘子Moon同Emily分享10號風球下搞婚禮嘅難忘經歷，話冒住風雨去接新娘，當晚婚宴時掛緊風球，仍有約九成賓客赴約，「佢哋真係冒住生死咁嚟參加呢場充滿風風雨雨嘅婚禮，每個人嚟到都祝福我哋『打風都打唔甩』，好感動亦好多謝佢哋」。
10年前8號波下做伴娘
呢對新人周日喺尖沙嘴酒樓星海．星海薈筵開25席，按原定計劃喺下晝5點證婚、夜晚7點開席，當時8號風球仍然生效。佢哋話朝早10號風球見到咁大風時「都有諗過仲擺唔擺得成(婚宴)」，但唔少親朋好友都遠道由海外飛返香港出席婚禮，好難再改期。佢哋回顧步入會場時見到全場坐滿賓客嘅一刻，「真係好感動，亦終於鬆一口氣」。
當日朝早Joe同Moon亦安排咗接新娘同敬茶環節。Joe話原本預訂咗嘅花車、小巴全因打風取消，全靠一班兄弟姊妹喺惡劣天氣下充當「柴可夫斯基」車佢哋去唔同目的地。Moon補充，當時路面情况惡劣，「地下有玻璃、針釘，好似打機咁要好留意路面，我哋有架車仲爆咗胎」，形容過程緊張刺激，「呢班好朋友真係會一世」。
婚禮順利完成，Moon自稱同丈夫係「天選之人」，話佢約10年前為好友婚禮擔任伴娘，當時正打8號風球，「想唔到10年後我自己嘅婚禮會遇上10號風球，好神奇」。佢亦多謝幫佢哋證婚嘅律師、婚宴公司同酒樓職員，喺橫風橫雨都願意配合，「本身計劃喺婚禮上進行嘅環節，全部都好順利咁完成到，好感恩」。
更多港聞
【Emily】港大醫學院津中辦健康創科盃 AI研肽類藥物 九龍真光奪冠
【明報專訊】港大醫學院同香港津貼中學議會舉辦首屆「香港健康創科盃」日前舉行決賽，12隊入圍中學生隊伍向醫學院教授組成嘅評判團，展現創新醫療科... 詳情
【Emily】兩三個鐘浸晒 韋帕毁新田向日葵花海
【明報專訊】颱風「韋帕」已離開香港，其風力雖然比近年同級颱風弱，但唔少地區風雨都幾大，位於新田嘅「信芯園」裏面約萬棵向日葵受創。農莊負責人梁... 詳情
【Emily】120學生工程師湖北考察水利建設
【明報專訊】今年係東江水供港60周年，政府及團體噚日帶領約120名中學生、工程系大專生、青年工程師等去湖北考察，了解國家重點水利建設項目。發... 詳情相關新聞
