【Emily】距奧運3年 曾俊華盼師弟蔡俊彥唞吓先
[2025.07.28] 發表
【明報專訊】27歲港隊劍擊名將蔡俊彥(Ryan)早前喺劍擊世界賽奪金寫港隊歷史，喺國際劍擊總會(FIE)公布嘅最新世界排名躍升「世一」。前財爺曾俊華形容呢位喇沙書院小師弟係好特別嘅劍手，當年入讀喇沙冇幾耐就加入劍隊。曾俊華話到中二，教練隊伍就安排佢代表學校參加校際比賽，當年Ryan最吸引佢及同助教嘅係見到佢眼中嗰團火，有絕不放棄嘅態度，仲會好有創意咁去應付唔同對手，所以喺賽場上不時可以做出一啲對手估唔到嘅怪招，經常都將對方殺個措手不及。
欣慰師弟改變衝動性格
不過，曾俊華話呢團火同時亦會令Ryan個性較急躁，話以前教練團成日哦佢，勸佢「用忍戒急」。曾俊華話聽到Ryan喺贏得世錦賽後話自己最近變得更有耐性，改變咗劍場上衝動嘅性格，話Ryan終於開竅，形容好令人感動。
曾俊華話好多人想Ryan成為下一個張家朗，但𠵱家距離洛杉磯奧運有3年時間，曾俊華認為Ryan現應趁機會放鬆唞唞先，呢段期間反而應做番多啲基本訓練，保持體能同正面情緒，到接近奧運先幫佢拉番上最高狀態。曾俊華話排名近100嘅選手實力相近，隨時可以擊敗「世一」，所以要有耐性、有部署咁去走。
更多港聞
【Emily】專頁惡搞整AI圖 葉太轉載讚「sweet」
【明報專訊】新民黨立法會議員葉劉淑儀一向都係網上談論嘅熱門人物，社交媒體甚至有專頁關注佢及出惡搞圖文。葉太噚日就喺社交媒體轉貼「我老公娶咗葉... 詳情
相關新聞
