【Emily】「地膽」率遊灣仔 隨文學尋「築跡」

【Emily】「地膽」率遊灣仔隨文學尋「築跡」

[2025.07.30] 發表

【明報專訊】市建局今個月起同香港文學舘及救世軍合作，舉辦為期兩個月嘅「地膽遊灣仔——文學築跡」活動，包括舉辦以文學作品中關於灣仔見聞為主軸嘅免費導賞團，帶市民遊覽多幢歷史建築。市建局亦同文學舘舉辦另一個以美食做主題嘅導賞團，分享提及灣仔食肆同香港飲食文化嘅文學作品，例如舒巷城筆下嘅快餐店、也斯嘅詩歌《鴛鴦》等。

市建局舉辦仲有「美食團」報名

文學舘精選超過50篇同灣仔有關嘅文學作品，涉及張愛玲、也斯、小思、何紫等41個作家，以佢哋筆下描述過嘅灣仔歷史、文化、具特色地方作為導賞團主軸，結合一眾「地膽」故事，希望加深參加者對灣仔歷史及發展嘅了解。導賞團以茂蘿街7號做起點，途經法定古蹟「舊灣仔郵政局」、一級歷史建築「藍屋」等。呢個導賞團每逢周三及隔周日舉辦，市民即日起可以報名參加8月嘅導賞團。

至於「文學故事×灣仔美食導賞團」就搞兩團，會到訪灣仔嘅酒家同茶餐廳等，亦會介紹相關文學作品，第一團已結束，第二團8月10日起接受報名，8月16日舉辦。

另外，市建局同文學舘製作「遊覽護照」，以圖像呈現灣仔景點，並分別喺茂蘿街7號、皇后大道東186至190號、利東街、舊灣仔郵政局、舊灣仔街市及藍屋6個地點擺放印章，市民喺「遊覽護照」集齊全部印章，就可以到指定地點換禮品同商戶消費禮券。

市建局透露，繼中上環「城蹤遊——地膽遊中」及「地膽遊灣仔」後，計劃將有關「地方營造」手法擴展到其他舊區，最快今年第四季喺九龍城推出相關活動。