【Emily】港鐵德福展 舊街坊顏汶羽帶父母搵回憶
[2025.08.22] 發表
【明報專訊】港鐵今日起喺德福廣場搞展覽，回顧呢項首個「鐵路加物業」嘅發展項目歷史。立法會議員顏汶羽噚日話佢嘅嫲嫲係德福花園首批業主，自己細細個就喺嗰度長大。為趁機會搵番啲「德福回憶」，佢趁展覽未開始帶埋仲喺德福住嘅父母去率先參觀。
顏汶羽喺facebook話，德福廣場落成45年，自己就喺德福生活咗18年，由3歲讀德福幼稚園，12歲搬到德福花園住，直至27歲先搬走。噚日重回舊地，佢話德福廣場無咩點變，依舊有嗰塊紅磚地、嗰座噴水池，仲醒起已經過身嘅嫲嫲曾經問佢「懂得揸車來德福嗎？」其實佢知道嫲嫲係想佢多啲返去搵自己。
顏汶羽話港鐵展覽模擬德福廣場當年嘅情景，令佢記起一幕幕童年回憶，特別係讀幼稚園時嘅麥當勞同郵局，佢希望市民都過去參觀吓，搵番啲「德福回憶」。
更多港聞
相關新聞
