【娛樂場】包辦新歌《下世愛你》曲詞 洪嘉豪拍MV被喊戲考起

【娛樂場】包辦新歌《下世愛你》曲詞洪嘉豪拍MV被喊戲考起

[2025.10.10] 發表

【明報專訊】洪嘉豪希望2025年的所有單曲出自個人創作，完全遵循自己的意願和理念，目標明年初出個人EP，今年先後推出《閃光》與《親愛的》，新歌《下世愛你》同樣由他包辦曲詞，Larry Wong編曲及監製，以戰爭為背景，從宏觀視角描繪愛情的深沉與堅韌，「數數手指，繼2020年《窮小子》就冇再出過比較大路、獨唱ballad的情歌。中間有些如《活人標靶》，不過就唔係太似《窮小子》嗰種『洪嘉豪type』情歌，因此想在這隻碟有一隻自己的『K歌』。首歌講『今世』在一個戰地裏，我們好努力求生，最後對方不能倖存，我承諾『下一世』一定會找到她，會做番今世嘅嘢」。

靠眼藥水激發情緒

新歌MV找來演藝學院畢業的演員任女主角，當中有場爆喊戲，洪嘉豪說以為對方是演員，拍喊戲應該比他更易拿揑，怎料女主角要哭也不容易，「我們用了好多時間，試了好多方法，導演跟我們溝通，盡量希望演到個力量，現場睇佢(女主角)演繹，都幾震撼。至於我呢？咁我就……拍咗一兩個take，嘗試喊完之後，導演話不如用眼藥水，我當然同意，點知當眼藥水滴落我隻眼度，情緒就嚟。導演即刻嗌action，我就喊咗出嚟，不過好遺憾我嘅眼淚同眼藥水混為一體，可能觀眾只會睇到係眼藥水，但係其實裏面到底有冇眼淚呢？聽完我呢番說話，應該都自有答案」。

以音樂表達心底話

洪嘉豪透露EP製作進度良好，希望可超額完成，趕及今年推出，「我覺得呢隻碟由《閃光》、《親愛的》和《下世愛你》，再加埋之後的作品，係講緊一些埋在我心底不輕易說出口而好想說的事，所以用音樂表達。亦因為做這個project，才真正認清音樂對我來說，就是將一些不想講的說話或不容易表達出來的東西，寫落隻歌度。可以暗語、暗示或用其他方法講，覺得好有趣，現在趕緊做的歌，so far都好喜歡和滿意，希望到時隻碟推出，大家都會喜歡」。