顧明均怨佔中 棄榮譽學位
「連行路都無自由 要博士做咩？」
[2014.10.24] 發表
【明報專訊】「電子大王」顧明均原本下月17號會喺浸大畢業禮接受榮譽工商管理博士學位，但佢噚日突然畀咗封信浸大校長陳新滋及傳媒，大罵佔領行動暴力，又話要向涉嫌打公民黨曾健超嘅「警隊七雄」致以最高敬禮；之後話鋒一轉，要求浸大取消向佢頒贈榮譽學位。Emily問佢點解，顧明均話﹕「我?家連行路嘅自由都冇，連呼吸嘅自由都冇，我唞唔到氣呀，咁攞個榮譽博士嚟做咩？」
向「警隊七雄」道歉
曾一口氣捐1億元畀浸大嘅顧明均喺信中話，鄙視泛民鼓吹違法、使用暴力、犧牲全港利益嘅卑劣言行，又形容示威者衝擊警隊係「有人類歷史以來，世界上任何獨裁國家，任何暴君均未敢有如此暴政惡行」。
顧明均又提到公民黨曾健超疑被警察毆打事件，佢話，「警隊七雄」喺受到嚴重挑釁、被佈局下而作出「大懲小戒」，係人之常情，七雄為市民利益而受處罰，所以自己要以追求真正民主、公義、感恩市民嘅身分，鄭重向七雄道歉。曾健超嘅代表律師就回應，顧明均有自由表達意見，「佢係富豪又點？佢講嘅話係咪比其他人有信服力？」
話馬時亨被噓 自己唔敢去
顧明均仲同Emily講，商務及經濟發展局前局長馬時亨去嶺大畢業禮被學生噓，好恐怖，令佢唔敢接受浸大頒發學位，「我係老粗，打起嚟，好驚我橫屍學校」。但浸大對顧明均依然誠意十足，陳新滋噚晚親自聯絡佢，話衷心希望佢出席典禮接受博士榮譽。
更多港聞
【明報專訊】特首梁振英（CY）原本準備喺嚟緊嘅星期日飛去倫敦，出席貿易發展局喺倫敦舉行嘅周年晚宴，不過Emily噚日收到風，CY突然決定唔去...
詳情
相關新聞
