議員出埠 立會會議唔夠人取消
[2014.12.23] 發表
【明報專訊】定時開會係立法會議員嘅基本工作，但聖誕臨近，好多議員都出埠去玩，搞到原定今晨舉行嘅交通事務委員會會議，因為唔夠人而索性取消。會議取消，相信最無癮嘅係運輸及房屋局長張炳良嘞，因為會議原定要審議港珠澳大橋工程超支而追加嘅55億元撥款項目。
委員會主席田北辰就話唔能夠怪一眾委員會偷懶，因為實情係會議本應安排喺19日(上周五)召開，但因為立法會大會延長至上周五，故交通事務委員會會議讓路，改期到今晨，相信部分議員早已安排咗外遊或其他工作，所以今日未能出席會議。
田北辰話，噚日朝早要求秘書處逐一問24名成員早上可唔可以出席，而委員會需要至少8人先夠法定人數，結果5人回覆能準時出席，5人能出席但要遲到，所以佢估計就算勉強開會都會唔夠人，所以取消會議。據知，向秘書處請假嘅人，有建制派也有泛民，所以唔可以鬧任何一方唔啱。
田北辰話，原定1月16日舉行嘅下次會議，會由兩小時加時至4小時，屆時除咗討論施政報告，仲一併傾番原定今日處理嘅議程。
更多港聞
相關新聞
